Почтальон
Ш.Насыйров сүз. Т.Кәримов көн.
Араларның ераклыгын
Кем якынайта?
Сагынганда сәлам хатын
Кем алып кайта?
Почтальон, почтальон,
Почтальон якынайта да
Почтальон алып кайта.
Туган авылыңнан хәбәр-хәл
Кем алып килә?
Кемгә кемнең хат язуын
Кем генә белә?
Почтальон, почтальон,
Почтальон алып килә дә
Почтальон гына белә.
Сөйгәнеңнең якты өметен
Кем хәбәр итә?
Дусларыңа ут эченнән
Кем сәлам илтә?
Почтальон, почтальон,
Почтальон хәбәр итә дә
Почтальон сәлам илтә.
Яшьлегеңә саф мәхәббәт
Кем алып килә?
Сөйгәнеңнең кем икәнен
Кем генә белә?
Почтальон, почтальон,
Почтальон алып килә дә
Почтальон гына белә.
