Слова - Якуб КОЛАС
Музыка - Николай ЯЦКОВ
На зямлю сырую
Ціха ночка пала.
Бляскам-дрыгаценьнем
Зорка заміргала.
Адзінокі месяц
Выплывае з хмары,
На зямлю, на неба
Сходзяць яго чары.
Зь цёмнай высі-багны
Ўжо глядзяць Стажары,
Пояс дыяментны
Ткуць нябёс абшары.
Лёгкімі шаўкамі
Леглі ў небе хмаркі,
I скрозь іх шчасьліва
Зоркі свецяць ярка.
Ох, нашто ж ты, ночка,
Так прыгожа-міла?
Колькі ў сэрцы думак
Ты мне абудзіла!
Ой, нашто пра волю
Голас твой сьпявае,
Калі маё сэрца
Волечкі ня мае?
Ой, ня кліч ты, ночка,
На прастор і волю,
Бо заплача сэрца
І душа ад болю!
Ночка-чараўніца!
Як ты ціха, міла!
Як ты многа думак
Ў сэрцы абудзіла!
