Мәпелеп көңілдің көктемімен,
Жетелеп өмірдің өткелімен.
Анашым, өзіңмен жүрегім бір,
Арманым, тілегім бір,
Қол үзіп балаң сенен кеткенімен.
Қайырмасы:
Бесікте тыныш жатпай,
Сәбиің жыласа тағат таппай.
Баяулап әнге салып,
Аялап қолына алып,
Ұйқысыз таңды атырдың көзің талып.
Арайлы болашағым,
Бақытты бала шағым,
Ананың ақ тілегі жол ашатын.
Алдыңда баршамыз бас иетін,
Анашым, ардақты қасиетің.
Тәрк етер бала деп денсаулығың,
Желбіреп ақ жаулығың,
Өмірің өнегелі өсиетің.